Wo de Gölä und de Trauffer es Konzärt im Fuessballstadion Letzigrund ahkündet hei, hei wahrschiendlich viu lüt dänkt die zwe spinne doch. No nie het e Schwiizer Künstler*in so öpis gwagt. Aber die zwe Bärner Oberländer wo sich ungerem Name Büetzer Buebe gfunde hei, schaffes tatsächlich s erschte Konzärt innert churzer Zyt uszverchoufe 45’000 Bilett hei sie verchouft! Scho das alleini isch e Sensation und schaffe zum Teil nid mal internationali Stars. Wäge grosser Nachfrag hei sich die beide Künstler dänkt, bühni steiht ja de scho u schute muess ah däm wucheändi ja oh niemer, de mache mir doch grad no es zwöits Konzärt. mit 30’000 Billet wo verchouft sie worde, chame meh vor däm Muet nur de Huet zieh.

Ja u den isch das cho wo die ganz Event Branche ine Schockzuestand versetzt und ufe herti Geduldsprob gstellt het. Ufgäh isch für niemer e Option gsi. oh nachem zwöite mal Verschiebe het meh drah gloubt s gröscht Mundart Volksfescht chöne düre z füehre.
Zwöi ä halb Jahr Spöter isch es de so wit gsi. Im Letzigrund steiht e riese Bühni wieme se i dene Dimensione nur vo Internationale Stars wie The Rolling Stones, AC/DC oder Coldplay kennt. Uf de Website www.buetzer-buebe.ch im Video Blog chame sich chli schlau mache wie das ganze gwachse isch.

I de Monate vorem Tag X isch natürlich intensiv probet worde. es isch oh drum gange siebezäh Musiker*inne z koordinieredas es nid wie e Guggemusig tönt, sondern äbe wie es Konzärt vo zwöi Bands vo hochprofessionelle Musiker*innen wo zu einer Mannschaft verschmilze.

Wo i zum Stadion cho bi isch no s Vorprogramm gloffe. unteranderem isch d Stimm vom Peach Weber z ghöre gsi. Mi het aber d Bradwurscht u e Bier meh interessiert. Nach dere Verpflegig bini de is Stadion gfüehrt worde. Dert isch no e Dj uf de Bühni gsi wo chli d Lüt zum mit klatsche animiert het. S einzig guete d Leila het er nid gsunge…
churz vor de 8i het de Roman Kilchsberger no s Publikum uf Betriebsthempratur bracht und wöue wüsse wär vo Züri oder Bärn chunt. Ja d Schwiiz het sich im Letzigrund ah däm Abe versammlet.
Punkt achti isch es de mit em Intro los gange. Hinger de Schiffcontainer wo als Bühnebild dient hei het e riese grossi LED-Wand gha wo es Video glofe isch. während sich die schar vo Musiker*inne bereit gmacht hei.
Die 6 Backgroundsänger*inne hei de «Büetzter büetzer Buebe» ahgstimmt churz druf abe si de Gölä und de Trauffer us de Container cho. natürlich het de Gölä no e Chrummä im Muuh gha. Aber s Grinse vo dene beide wär bim wäsche gloub oh nid usgange. Kei Wunder, wenn meh so lang uf dä Momänt häre blanget und so viel Büetz investiert het. Dä ganz Ufwand isch es aber wärt gsi. s Publikum isch bi jedem Lied chli meh mit gange. Bi de Gölä Songs isch sehr luut mit gsunge worde. de Trauffer het z Publikum uf sini art zum tanze und klatsche bracht. So isch d Stimmig durchgehend guet gsi.
Bi de Lieder «Meitschi tanz dür d Nacht» und «Ma chérie» isch de no e dritte Schwizer Musiker zum Zug cho. Sis «Instrumänt» isch es DJ Pult oder besser e USB-Stick. De DJ Antoine het die beide mit Dance Beats begleitet. Wenn das öper guet fingt schön. Für mi isch es eifach nüt. Zum Glück isch dä Teil vo de Show churz gsi das meh gar nid meh Wort drüber muess verlüre.
De nöchscht Programpunkt het mir de scho viel besser gfaue. De Gölä het aus Schueugiu mau e Band gha wo er Schlagzüg gspielt het. Und de Trauffer het bi sinere vorgängige Band mit em Name Airbäg de Rytmus vorgäh. Die beide hei ihres Handwärk super im Griff gha u es richtig geils Drumsolo gspielt. Oh hie hei die beide eifach Spass ar Sach gha. Ob das perfekt oder nid tönt het, het se nur bedingt interessiert. De Unterhaltigswärt isch aber sehr höch gsi und fürs Publikum e cooli Überraschig gsi.

I ha mi wärend em Konzärt luege e bitz gfragt wieso die so ä länge Stääg vor Bühni is Publikum use hei wenn sie glich immer dihinger blibe si. Mitti Konzärt isch de das Rätsel glöst worde. Die beide hei ihrne Büetzer Buebe u Meitschi e churzi Pouse gönnt u dert es ruhigers Lied gspielt. De Trauffer isch as Keyboard ghocket de Gölä het sini Sehnsuchtsbratpfanne (Akustik Gitarre) uf d Chöi gno. De Trauffer het de d Ileitig zum Lied «Indianer» gspielt. De Gölä, wie meischtens nur Flouse im Chopf het de «Schwan» ahgstimmt. Was den passiert isch gits nur ah Live Konzärt! 45’000 hei sofort sis bekanntischte Lied afah singe. Das isch no ächti Konzärtmagie und e ungloublich schöne, vielicht e unplante, Hüenerhut momänt. De Trauffer het sich jedefalls chum chönne erhole vor Lache und het versuchet s Publikum z unterbräche. Er het de no mal d Iletig gspielt und de Gölä de zue bewegt über d Indianer us Amerika z singe. das ganze isch grad so emotional u schön gsi wie s Lied vom wisse Vogel wo de chli spöter oh no uf de Setlischte gsi isch.

Gsamthaft sibenezwänzg Lieder hei die beide i Ihri zwöiehalb Stund lange Show gspielt oder besser zelebriert. Will bi jedem Lied hei sie entweder e cooli Video Animation gha oder e grossi Tanzgruppe wo links u rächts vo de Bühni performt hei.
Mit dene beide Konzärt im Letzigrund mit gsamthaft 75’000 Bsuercher*inne hei d Büetzerbuebe Schwizer Musig gschicht gschribe. Irgendwie schad, dass das Projekt mitem Uftritt am eidgenössische Schwing un Älplerfescht in Pratteln es ändi nimmt. Will das Projekt het i jeder Hinsicht viel Potenzial und isch e bericherig für d schwiizer Musiglandschaft.